២០២០ ​ចូលឆ្នាំ ចាំមិនភ្លេច ខូវីដកំទេចពិភពលោក

ឆ្នាំនេះចម្លែក ប្លែកសព្វមួយដង

ប្លែកច្រើនកន្លង  ប្រឹងឆ្លងអោយផុត

ប្លែកប្រក្រតី  ដង្ហើមស្ទើរផុត

យើងប្រឹងប្រយុទ្ធ   ដើម្បីជីវិត ។

រីករាយឆ្នាំថ្មី សួរស្ដីបវរ

សូមសេចក្ដីល្អ   ប្រែសណ្ដានខ្មៅ

សូមទេព្តា(ឆ្នាំ)ថ្មី  មានព្រះទ័យជ្រៅ

នាំរោគផុតទៅ  កុំនៅបន្សល់ ។

ខ្ញុំសូមបួងសួង  ដល់អ្នកមានគុណ

បុព្វការីជន  អង់អាចហានក្លា

សូមជួយកូនខ្មែរ  ជួយដែនខេមរា

សូមបានសុខា  អំណេះតទៅ។

អាថ៌កំបាំងមហានគរខ្មែរ

ខំដាំ

   

នាំមនុស្សដើរផ្លូវត្រូវ                           ដូចរែកថ្មឡើងដើមត្នោត
អូសហុបឡើងច្រាំងចោត                  បទពិសោធន៏ពិបាកណាស់។

បើចង់បានផ្លែផ្កា                                 រុក្ខផល្លាអាចរហ័ស
ដប់ឆ្នាំឃើញផលច្បាស់                     ផ្លែខ្ចីចាស់ ទុំបេះបាន។

រីផលអំពើល្អ                                       ក្ដឹបហើយជ្រុះចុះចាកឋាន
មិនងាយទុំបេះបាន                            ត្រូវតឹងតាន ច្រើនសិបឆ្នាំ។

ដូច្នេះ ត្រូវខិតខំ                                  ប្រឹងសន្សំជាប្រចាំ
អប់រំច្រើនសិបឆ្នាំ                               ព្យាយាមដាំទើបសំរេច៕

(ពេជ្រ ទុំក្រវ៉ិល)

ជំនឿហោរពីព្រេង

សង្គមបុព្វកាល                   បានរីករាលដាល             ប្រផ្នូលទាយពិត
ព្រោះសង្គមនោះ                ស្រីប្រុសមូលមិត្ត              រស់នៅជិតស្និទ្ធិ
ស្មើភាពយ៉ាងល្អ។

ស្រីនៅចាំដៃ                      និងរិះរំពៃ                         ដាំស្រូវអង្ករ
ធ្វើការតាមមេ                     គិតគ្នេរស្មោះសរ            ប្រុសៗសញ្ខរ
ដើរបរបាញ់សត្វ។

ពេលប្រុសចេញទៅ          ស្រីៗនាងនៅ                  ខ្វល់ខ្វាយប្ដីបាត់
វង្វេងក្នុងព្រៃ                      គិតភ័យខ្លាចសត្វ            សាហាវដេញស្កាត់
មានគ្រោះមរណា។

នឹកខ្លាំងគិតខ្លាំង                សតិភ័នភាំង                   ឈាមរត់ខ្លាំងក្លា
ទៅជាញាក់ភ្នែក                អល់អែកកង្ខា                  ចំណាំធម្មតាឃើញ
ប្រុសមកដល់។

ក្រោយឃើញបក្សី             ក្អែកបូលខ្លីៗ                 ​  គេនឹកពិផល
ឃើញប្រុសមកទៀត   ​​​​​      គេឆ្លៀតលែងឆ្ងល់         ប្រផ្នូលបូលផ្ដល់
អោយគេចេះទាយ។

រឿងទាយនេះពិត             ស្ទុះដល់កំរិត                   រីកធំទូលា
យលឺមាន់រងាវ                  គេជ្រាវដល់ផាយ            ធម្មជាតិទាំងឡាយ  
ប្រាប់កាលវេលា។

តារា(សាស្រ្ដ)ពីព្រេង       គេក៏ឈ្វេងយល់              មកពីកិច្ចការ
ប្រកបរាល់ថ្ងៃ                  ក្នុងព្រៃព្រឹក្សា                   តាមដងគង្គាទាយ
ទាំងភ្លៀងខ្យល់។

សង្គមទាសភាព            វណ្ណៈខ្ពស់ទាប                  ហោរទាយតាមផល
ប្រយោជន៏វណ្ណៈ           ទើបធ្លាក់វិលវល់            ​    ​ហោរដើរទៅដល់
គំនិតនិយម។

តាមពិតការទាយ     ​    ប្រយោជន៏ទួលាយ           ដល់សង្គមជាតិ
បែងល្វែង ខែ ថ្ងៃ          គិតឆ្នៃប្រមុំ                         រដូវដោយក្រុម
ទាយមេឃ ផ្កាយ ដី៕

(សិល្បៈកំណាព្យ)

ភ្នែក និង ស្មារតី

កើតម​កជាមនុស្សក្នុងលោកិយ                         ស្មារតីក្ដោបខ្វិនខ្វះវិញ្ញាណ
មានភ្នែកដូចខ្វាក់ខ្ជិលអៀនប្រៀន                 មិនខំសូត្ររៀនការជាក់ស្ដែង។

សត្វគោក្របីគេចាប់ខ្លុះ                     មនុស្សទាំងស្រីប្រុស ត្រូវខែងរែង
កុំអោយគេខ្លុះអូសខ្វាត់ខ្វែង         ទើបស្រែកក្ដែងៗ អាសូរខ្លួន។

ភ្នែក និង ស្មារតី ស្ដីអោយច្បាស់       ត្រូវអោយរហ័ស ហើយនឹងនួន
សត្រូវ និង មិត្រចែកដោយខ្លួន         ភ្នែកមើលផ្ទួនៗ សតិវៃ៕
(ប្រភព  សិល្បៈកំណាព្យ)

រដូវច្រូតកាត់

សន្ធិយារាត្រីពេលព្រលប់              យប់ងងឹតស្លុប ផ្កាយព្រោងព្រាត
កសិករចូលភូមិជួបជុំញាតិ            គេឆ្លៀតសាកសួរ យកវេនគ្នា។

លឺមាត់រចចគ្រប់កន្លែង           
អញឯងអឺអើ ស្នើវេលា
មាន់រងាវកុះ ចុះដាក់គ្នា                 ក្រោកឡើងម្នីម្នា ទាំងប្រុសស្រី។

កណ្ដៀវមួយម្នាក់ស្ងាបញីភ្នែក     ខ្លះពន់ខ្លះរែក ដើរទៅខ្មី
ខោអាវខ្មៅៗទាំងប្រុសស្រី           ច្រូតកាត់ស្រូវថ្មី យ៉ាងសប្បាយ។

អរុណរះចាំងលើស្រូវទុំ                មើលដូចកញ្ចុំមាសឆើតឆាយ
លឺតែសំណើច សាចក្អាកក្អាយ   ព្រះពាយផាត់ផាយកាយកសិករ។

ប្រជាចំរៀងច្រៀងឆ្លើយឆ្លង        ប្អូនបងមារមីងជួយបន្ទរ
មាត់ច្រៀងដៃច្រូតកណ្ដាប់គរ     យូរៗគេឈរបង្កូកខ្យល់៕

អនាគតអ្នកក្រ

អ្នកក្រទោះបីសោយវេទនា                           លំបាកមហិមាគ្រប់ទីស្ថាន

ពុំអាចលះបង់ព្យាយាមបាន                         សណ្ដានត្រិះរិះអនាគត។

ប្រៀបដូចបុប្ផា ផ្កាបុទុម                                ជាទីមនោរម្យក្លិនកមុទ

ក្រអូបក្លិនក្លែបពិសេសផុត                         ​  ​ព្រោះវាតយុទ្ធ នឹងភក់ល្បប់។

ពុំនោះដូចកលអេឡិកទ្រិក                          ទាញខ្សែពន្លិចជីកដីកប់

កុំមើលងាយវាដោយខឹងស្អប់                      គង់ឆក់សន្លប់ព្រោះដើរជាន់៕

(ដកស្រង់ចេញពី សិល្បៈកំនាព្យ )